Esperanto-kvizo

La unua tutmonda enreta Esperanto-Kvizo finiĝis!

Ĉu vi pensas ke vi jam scias multon pri Esperanto? Ĉu ne nur la lingvon mem vi bone regas, sed ankaŭ detalajn sciojn vi havas pri ties movado, historio kaj kulturo? Tiukaze nia “Esperanto-Kvizo” estas ĉi tie ĝuste por vi!

UEA lanĉis en tiu ĉi daŭre malfacila tempo de limigoj de personaj kontaktoj tutmondan enretan kvizon, kies celoj estas samtempe edukaj kaj amuzaj. La kvizo volis parte instrui al vi – proponi eblajn novajn, utilajn informojn pri Esperanto kiel tutmonda fenomeno, kun ĝia riĉa historio kaj agadoj. Aliflanke la kvizo estas amuza aktivaĵo – dum kiu vi povas testi vin mem, por ekscii, kiujn sciojn vi ja jam havas kaj kiujn ankoraŭ indas plibonigi.

En unu kvizo troviĝas ĉiam 12 demandoj, el 12 kategorioj (po unu de ĉiu), por ĉiu respondo estas maksimume 20 sekundoj. Ĉiu demando havas nur unu ĝustan respondon. La poentoj kalkuliĝas kaj por la ĝustaj respondoj, kaj por la rapideco de la respondoj.

Nu kaj por ke la kvizo estu eĉ pli alloga, UEA, kune kun pluraj sponsoroj, pretigis por vi diversajn valorajn Esperanto-premiojn! La kvizo do ne nur povas helpi al vi ekscii novaĵojn pri nia komunumo, aŭ testi vin, kion ĉion vi jam scias, sed aldone ebligas al ĉiu gajni!

La kvizo estis lanĉita okaze de la unua tago de la 2-a VK (Virtuala kongreso), la 17-an de julio kaj daŭris ĝis la 31-a de aŭgusto 2021.